Përditësimi i fundit i të dhënave nga Komisioni Qendror i Zgjedhjeve ka sjellë një rikonfigurim të shpërndarjes së ulëseve në Kuvend, ku Lëvizja Vetëvendosje ka siguruar mandatin e saj të 57-të. Ky ndryshim vjen si rezultat i numërimit të votave të fundit, duke e forcuar edhe më shumë pozicionin e partisë fituese në legjislaturën e ardhshme, raporton Vrojtuesi.
Ky ndryshim ka ardhur drejtpërdrejt në kurriz të Partisë Demokratike të Kosovës, e cila ka humbur një ulëse, duke zbritur në 22 deputetë sipas projeksioneve më të fundit.
Eugen Cakolli nga Instituti Demokratik i Kosovës ka konfirmuar se diferenca që ka përcaktuar këtë lëvizje mandatesh ka qenë ekstremisht e ngushtë, ku vetëm pak vota kanë bërë ndarjen mes fitores së VV-së dhe humbjes së PDK-së në këtë raund përditësimi.
Ky rezultat e vendos partinë në pushtet në një pozicion akoma më dominues, ndërkohë që Lidhja Demokratike e Kosovës mbetet e palëkundur me 15 mandate dhe Aleanca për Ardhmërinë e Kosovës me 6 sosh, duke konfirmuar një konfigurim të ri të forcave në legjislaturën e ardhshme.
Në qendër të këtij triumfi qëndron Albin Kurti, i cili tashmë është konfirmuar si njeriu më i votuar në historinë politike të Kosovës.
Me mbi 96.6% të votave të procesuara, sipas përditësimeve të KQZ-së, lideri i Lëvizjes Vetëvendosje ka arritur shifrën historike prej 385,900 votash, duke lënë pas jo vetëm rekordin e tij të mëparshëm, por edhe çdo tavan elektoral të vendosur ndonjëherë në Kosovë.
Ky legjitimitet plebishitar reflektohet në mbarë listën e fituesit, ku Glauk Konjufca pason me 302,927 vota, i ndjekur nga Albulena Haxhiu me 164,157 vota, Hekuran Murati me 162,170 vota dhe Donika Gërvalla-Schwarz me 145,209 vota.
Sipas të dhënave të Komisionit Qendror të Zgjedhjeve, kjo mbështetje masive e ka shndërruar Vetëvendosjen në një forcë që kontrollon 50.67% të votës së përgjithshme, duke krijuar një distancë të pashëmbullt me rivalët.
Fuqia e këtij rezultati është ushqyer në mënyrë vendimtare nga diaspora, ku numërimi i rreth 28 mijë votave me postë ka treguar një dominim absolut të VV-së me 72.20%.
Sipas KQZ-së, nga ky kontingjent votash, Albin Kurti ka vjelë personalisht 18,403 vota, ndërsa partitë e tjera kanë siguruar shifra simbolike: LDK ka marrë 10.15% (2,720 vota), PDK 9.56% (2,560 vota) dhe AAK 3.90% (1,045 vota).
Zëdhënësi i KQZ-së, Valmir Elezi, bëri të ditur se procesi nuk ka përfunduar ende, pasi pritet numërimi i rreth 20 mijë pakove të tjera me fletëvotime nga jashtë, krahas votave me kusht dhe personave me nevoja të veçanta.
“Janë rreth 20 mijë pako me fletëvotime të tërhequra më 2 dhe 5 janar që pritet të numërohen së shpejti”, deklaroi Elezi, duke paralajmëruar se rezultati final mund të shpallet para 19 janarit.
Në kampin opozitar, humbja e mandatit të 23-të nga PDK-ja ka vulosur një krizë të re numrash. Bedri Hamza, ndonëse mbetet figura më e votuar në partinë e tij me 158,413 vota, ky sukses personal nuk ka mjaftuar për të ruajtur kuotën e mëparshme të mandateve, duke e lënë subjektin e tij me vetëm 22 ulëse në Kuvend. Pas tij në PDK renditen Arian Tahiri me 69,958 vota dhe Përparim Gruda me 64,408 vota.
Situata mbetet po aq sfiduese për LDK-në, ku Lumir Abdixhiku ka grumbulluar 86,178 vota, i ndjekur nga Hykmete Bajrami me 55,314 vota dhe Ukë Rugova me 48,021 vota.
Ky rezultat e lë ish-opozitën në një pozicion ku reagimi dhe reflektimi i brendshëm duken të pashmangshëm, sidomos pas deklaratave të Abdixhikut se rezultati është larg ambicieve të partisë më të vjetër në vend.
Përtej euforisë së numrave, realiteti i ri parlamentar imponon nevojën për stabilitet institucional, veçanërisht për zgjedhjen e presidentit të ri.
“Bllokadat janë të pamundshme tanimë. Na duhet të bisedojmë edhe me opozitën për presidentin e ardhshëm. Por, dihet që edhe për zgjedhjen e presidentit, na duhen 80 veta në sallë,” deklaroi ditë më parë Albin Kurti, duke shfaqur një ton më bashkëpunues pas konfirmimit të fitores. /Vrojtuesi
