Festimet e ndërrimit të viteve janë shndërruar në një skenë kaosi dhe vdekjeje në alpet zvicerane, ku një shpërthim i fuqishëm në një lokal të mbushur me turistë dyshohet se ka lënë pas rreth 40 të vdekur dhe mbi 100 të plagosur.
Ngjarja e rëndë ndodhi në orën 01:30 të mëngjesit në resortin luksoz të skive Crans-Montana, brenda ambienteve të barit “Le Constellation”, i cili në momentin e incidentit ishte i tejmbushur me qytetarë që festonin ardhjen e vitit 2026.
Dyshimet e para flasin për një bilanc tragjik që mund të arrijë deri në 40 të vdekur, sipas raportimeve të mediave ndërkombëtare, ndërsa pamjet nga vendi i ngjarjes tregojnë strukturën e ndërtesës duke u shkrumbuar nga flakët masive dhe ekipet e emergjencës që po luftojnë dëshpërimisht me kohën nën rrënoja.
🇨🇭🔥🎉 ALERTE INFO – Une explosion a déclenché un incendie dans un bar de Crans-Montana (VS) lors des festivités du Nouvel An, faisant plusieurs morts et blessés graves. (Blick) pic.twitter.com/GKiGZfTETs
— SuisseAlert (@SuisseAlert) January 1, 2026
Policia e Kantonit Valais ka pranuar mëngjesin e sotëm se bëhet fjalë për një tragjedi të vërtetë me ‘dhjetëra të vdekur’, por kaosi në vendngjarje e bën të pamundur një bilanc të saktë për momentin, transmeton Vrojtuesi.
Komandanti i policisë, Frédéric Gisler, u shpreh i tronditur nga ajo që gjeti në vendngjarje, duke saktësuar se bëhet fjalë për “disa duzina viktimash”.
Sipas autoriteteve lokale, shkaku i shpërthimit mbetet ende i paqartë, por prokuroria ka përjashtuar paraprakisht pistën e një sulmi terrorist, duke e trajtuar rastin si një zjarr aksidental me pasoja fatale.
Prokurorja Béatrice Pilloud deklaroi se prioriteti aktual është identifikimi i trupave të pajetë dhe njoftimi i familjarëve, shumë prej të cilëve janë turistë të huaj.
Situata në spitalet e rajonit paraqitet e rënduar, me njësitë e kujdesit intensiv në spitalin e Valais që kanë arritur kapacitetin maksimal.
Mathias Reynard, kreu i qeverisë kantonale, bëri të ditur se shumica e të lënduarve ndodhen në gjendje të rëndë dhe po transferohen me urgjencë drejt qendrave të tjera mjekësore.
Për menaxhimin e situatës janë mobilizuar 10 helikopterë dhe 40 ambulanca, ndërsa mbi zonën e Crans-Montana është vendosur një zonë e ndaluar fluturimi për të lehtësuar operacionet e kërkim-shpëtimit.
Sipas një dëshmitari që foli për radion Rhone FM, operacioni i shpëtimit ishte masiv dhe i menjëhershëm. Ai përshkroi zhurmën e helikopterëve që çanin natën për të tërhequr dhe transportuar me urgjencë personat e lënduar që kishin nevojë për ndihmë jetike.
Ky incident shënon një nga ngjarjet më të rënda në historinë e vonë të kantonit Valais, një rajon që ende mban mend aksidentin e rëndë të autobusit në tunelin e Sierre në vitin 2012, ku humbën jetën 28 persona, përfshirë 22 fëmijë belgë.
Ndërsa hetimet vazhdojnë për të zbardhur origjinën e shpërthimit në “Le Constellation”, autoritetet zvicerane kanë ngritur një linjë telefonike dhe një qendër pritjeje për të asistuar familjet e prekura nga kjo fatkeqësi që tronditi festimet e Vitit të Ri në zemër të Evropës. /Vrojtuesi
