Sipas informacioneve të publikuara, aksidenti ka ndodhur të dielën në mbrëmje, pak pas orës 18:30, në Birrfeldstrasse pranë Wohlenschwilit. Për arsye që ende nuk janë bërë të ditura, automjeti tip Renault që drejtohej nga 37-vjeçari ka dalë nga rruga dhe është përplasur me një shtyllë ure.

Ekipet e emergjencës kanë mbërritur menjëherë në vendin e ngjarjes, por pavarësisht përpjekjeve për t’i shpëtuar jetën, Blerimi ka ndërruar jetë në vend.

I ndjeri jetonte në rajonin e Wohlenit, ishte i martuar dhe baba i tre fëmijëve. Ai punonte në një kompani të njohur të industrisë së orëve dhe njihej si një tifoz i apasionuar i futbollit, duke qenë aktiv edhe në një klub futbollistik lokal.

Lajmi për vdekjen e tij ka tronditur familjarët, miqtë dhe bashkëpunëtorët. Një mike e familjes ka deklaruar për mediat zvicerane se humbja e tij ka prekur thellë të gjithë ata që e kanë njohur.

“Është jashtëzakonisht tragjike që ai nuk është më mes nesh. Ai lë pas bashkëshorten dhe tre fëmijët”, është shprehur ajo.

Dhimbja është e madhe edhe në komunitetin shqiptar në Zvicër, ku Blerimi gëzonte respekt dhe vlerësim të madh. Sipas të afërmve, babai i tij kishte qenë një figurë e njohur për angazhimin në çështjen e çlirimit të Kosovës.

Në vendin ku ndodhi aksidenti janë vendosur lule dhe mesazhe ngushëllimi, ndërsa shumë qytetarë kanë shprehur pikëllimin e tyre edhe në rrjetet sociale.

Autoritetet e kantonit Aargau kanë nisur hetimet për të zbardhur plotësisht rrethanat e aksidentit. Deri më tani nuk është bërë e ditur nëse në ngjarje kanë ndikuar probleme shëndetësore, shpejtësia apo faktorë të tjerë. /Albinfo

Sipas të dhënave të përditësuara të dielën mbrëma, Lëvizja Vetëvendosje ka arritur në 52 ulëse në Kuvend, ndërsa PDK-ja ka humbur mandatin e 23-të, i cili i ishte rikthyer përkohësisht gjatë një faze të mëhershme të numërimit.

Lëvizjet në mandate po ndodhin gjatë numërimit të votave me postë nga diaspora, proces i cili ende nuk ka përfunduar. Deri në përditësimin e fundit, Vetëvendosje ka 45.52 për qind të votave, apo 345 mijë e 220 vota. PDK-ja renditet e dyta me 20.11 për qind, apo 152 mijë e 502 vota.

Lidhja Demokratike e Kosovës ka 17.12 për qind, apo 129 mijë e 863 vota, ndërsa Aleanca për Ardhmërinë e Kosovës ka 6.92 për qind, apo 52 mijë e 499 vota.

Mandati i 52-të i Vetëvendosjes ka lëvizur disa herë gjatë mbrëmjes. Fillimisht, pas përpunimit të mbi 40 për qind të votave të ardhura me postë nga diaspora, LVV-ja e kishte siguruar këtë ulëse, duke e lënë PDK-në me 22 mandate.

Më pas, gjatë numërimit të 92.58 për qind të votave të përgjithshme, PDK-së i ishte rikthyer mandati i 23-të. Por pas përditësimit të ri, Vetëvendosje e mori sërish ulësen e 52-të, ndërsa PDK-ja ra përsëri në 22 ulëse.

Votat e diasporës kanë pasur ndikim të drejtpërdrejtë në balancën e mandateve. Vetëvendosje kishte nisur me 48 ulëse nga votat e numëruara brenda Kosovës, ndërsa me përfshirjen e votave jashtë vendit fillimisht kaloi në 50 mandate, më pas në 51 dhe tani në 52.

Në fazat e mëhershme të numërimit, ndryshimet prekën edhe partitë e tjera shqiptare. LDK-ja kishte humbur një ulëse, ndërsa AAK-ja kishte zbritur nga tetë në shtatë mandate sipas projeksioneve të deritanishme. Megjithatë, ndarja përfundimtare mbetet e hapur derisa të përmbyllet i gjithë procesi i numërimit dhe të certifikohen rezultatet.

Në zgjedhjet e parakohshme parlamentare votuan rreth 725 mijë qytetarë brenda Kosovës, ndërsa mbi 100 mijë shtetas jashtë vendit e ushtruan të drejtën e votës përmes përfaqësive diplomatike ose me postë.

Rezultati aktual mbetet preliminar. Përbërja përfundimtare e Kuvendit do të dihet vetëm pas përfundimit të numërimit të të gjitha votave dhe certifikimit të rezultateve nga Komisioni Qendror i Zgjedhjeve. /Vrojtuesi

Trump shkroi në Truth Social se anijet “kanë filluar të lëvizin”, duke shtuar se shumë prej tyre janë të ngarkuara me naftë dhe po kalojnë përgjatë asaj që ai e quajti “Autostrada Jugore” në Ngushticën e Hormuzit.

Sipas presidentit amerikan, ky korridor është “plotësisht i sigurt, i mbrojtur dhe i pastër”, ndërsa ai shtoi se ekzistojnë edhe rrugë të tjera kalimi për anijet.

Marrëveshja paraprake mes SHBA-së dhe Iranit u bë publike fillimisht nga kryeministri i Pakistanit, Shehbaz Sharif, ndërsa më pas u konfirmua nga Trump. Sipas raportimeve ndërkombëtare, palët janë pajtuar për ndaljen e luftimeve, rihapjen e Ngushticës së Hormuzit dhe vazhdimin e negociatave për çështjet më të ndjeshme mes Washingtonit dhe Teheranit.

Reuters raportoi se bëhet fjalë për një memorandum mirëkuptimi, ndërsa nënshkrimi formal i marrëveshjes është paraparë për të premten në Zvicër. Detajet e plota nuk janë bërë publike, ndërsa çështjet që lidhen me programin bërthamor të Iranit dhe lehtësimin e mundshëm të sanksioneve pritet të trajtohen në bisedime të mëtejshme.

Pas njoftimeve për marrëveshjen, nafta Brent ra me rreth 5 për qind, në afër 83 dollarë për fuçi. Rënie shënoi edhe nafta amerikane WTI, pas pritjeve se rihapja e Hormuzit mund ta ulë rrezikun për furnizimin global me energji.

Megjithatë, qarkullimi i anijeve nuk është rikthyer ende në ritmin normal. Reuters raportoi se të dhënat e gjurmimit të anijeve gjatë së hënës nuk tregonin kalime të mëdha tankerësh nëpër Hormuz, përveç një anijeje me gaz të lëngshëm.

Në të dy anët e ngushticës vazhdojnë të qëndrojnë ende dhjetëra tankerë. Sipas të njëjtit raportim, kompanitë e transportit detar dhe ato të sigurimeve po presin garanci më të qarta për sigurinë e kalimit, për pastrimin e mundshëm të minave detare dhe për mënyrën se si do të mbrohen anijet në ditët në vijim.
Në Kosovë, rënia e çmimeve në tregjet botërore nuk është reflektuar ende në çmimet ditore të derivateve. Për ditën e sotme, çmimi maksimal i lejuar për naftën është caktuar në 1.50 euro për litër.

Sipas çmimeve të publikuara për tregun vendor, benzina ka çmim maksimal prej 1.39 euro për litër, ndërsa gazi 0.67 euro për litër. /Vrojtuesi

Mbështetja e njëhershme është pjesë e Pakos për Përballje me Inflacionin 2.0 dhe u dedikohet punëtorëve të sektorit privat që kanë aplikuar dhe janë kualifikuar për këtë masë.

Murati tha se pagesat janë kryer sipas paralajmërimit të mëhershëm, duke konfirmuar se procesi për këtë kategori tashmë ka kaluar në fazën e ekzekutimit.

“Pagesat për përfituesit që kanë plotësuar kriteret për mbështetje të njëhershme të punëtorëve të sektorit privat, në kuadër të Pakos për Përballje me Inflacionin 2.0, tashmë janë ekzekutuar, ashtu siç patëm paralajmëruar”, ka shkruar Murati.

Ndërkohë, studentët që kanë aplikuar për mbështetjen prej 100 euro nuk do t’i marrin ende pagesat. Sipas Muratit, komisioni vlerësues është ende duke punuar në shqyrtimin e listave.

“Për masën e mbështetjes së studentëve komisioni vlerësues po vijon punën dhe do t’ju njoftojmë sapo listat të jenë gati për ekzekutim”, ka shtuar ai.

Ekzekutimi i pagesave për sektorin privat ishte paralajmëruar më herët gjatë ditës nga zëvendësministri i Financave, Hysni Mehani. Ai kishte konfirmuar se mjetet pritej të dilnin sot për punëtorët e kësaj kategorie.

“E keni parë postimin e ministrit. Po, sot pritet të ekzekutohen mjetet”, kishte deklaruar Mehani për Indeksonline.

Zëvendësministri kishte sqaruar gjithashtu se aplikuesit që kanë bërë gabime gjatë aplikimit do të kenë mundësi të aplikojnë përsëri. Sipas tij, këto raste do të trajtohen nga komisionet përkatëse.

“Po, të gjithë ata që kanë bërë ndonjë gabim gjatë aplikimit do të kenë mundësi të aplikojnë përsëri. Janë komisionet ato që i trajtojnë këto raste”, ka thënë Mehani.

Pakoja për Përballje me Inflacionin 2.0 ishte miratuar nga Qeveria e Kosovës më 22 maj 2026. Ajo parasheh mbështetje të njëhershme prej 100 eurosh për disa kategori të qytetarëve, përfshirë pensionistët, fëmijët, punëtorët e sektorit jopublik dhe studentët aktivë.

Pagesat për sektorin privat ishin paralajmëruar më herët se do të ekzekutoheshin të hënën. Me njoftimin e sotëm, Ministria e Financave ka konfirmuar se ky proces është përmbyllur për përfituesit që i kanë plotësuar kushtet.

Për studentët, ndërkohë, mbetet të pritet përfundimi i verifikimit nga komisioni vlerësues. Vetëm pas finalizimit të listave pritet të bëhet edhe ekzekutimi i pagesave për këtë kategori. /Vrojtuesi

Burimet e Gazetës Sinjali bëjnë me dije se ngjarja ka ndodhur pasditen e së dielës në Frashër të Madh, në rrugën qarkore të Mitrovicës së Veriut.

Sipas kallëzimit të viktimës, M. Behrami (29 vjeçar), ai ishte duke lëvizur me veturë kur është ndalur për t’u përshëndetur me një fqinj që po udhëtonte me traktor. Pas traktorit ndodhej një automjet tip pikap me ngjyrë të bardhë, pa targa, në të cilin ndodheshin tre persona.

Pasi kishte vazhduar rrugën dhe kishte dalë në rrugën kryesore, afër shkollës së vjetër, pikapi i kishte prerë rrugën.

Tre personat kishin dalë nga vetura dhe, sipas viktimës, i ishin drejtuar me fjalët: “Pse po na kqyr shtremt? Edhe një herë ma moti na ke kqyr shtremt.”

Më pas, njëri prej tyre i kishte kërkuar: “M’i jep 20 euro.”

Kur ai u kishte thënë se nuk kishte para, situata kishte eskaluar. Njëri nga të dyshuarit e kishte kapur për fyti, tjetri e kishte goditur me shuplakë, ndërsa personi i tretë kishte hapur derën nga ana e bashkudhëtarit dhe nga xhepi i pantallonave ia kishte marrë kuletën, në të cilën ndodheshin 150 euro para të gatshme.

Pas raportimit të rastit, viktima ka arritur që përmes fotoalbumit policor ta identifikojë njërin nga të dyshuarit, i cili sipas burimeve të Sinjalit është Faton Rexhepi (27 vjeç).

I njëjti është shoqëruar në stacion policor dhe është intervistuar në prani të avokatit mbrojtës, por ka mohuar përfshirjen në rast, duke deklaruar se në kohën e ngjarjes nuk kishte qenë fare në Frashër.

Me udhëzim të Prokurorit të Shtetit, rasti është iniciuar si “Grabitje”, ndërsa Faton Rexhepi, pas intervistimit, është liruar në procedurë të rregullt.

Një vështrim që u interpretua si provokim, një pikap pa targa dhe 150 euro të grabitura – ngjarje që tashmë mbetet në duart e hetuesve për të zbardhur rolin e secilit nga të përfshirët.

Shënim: Personi i përmendur në këtë lajm konsiderohet i pafajshëm derisa fajësia e tij të vërtetohet me vendim të formës së prerë të gjykatës kompetente.

Të arrestuarit dyshohet se kanë qenë ish-pjesëtarë të Ministrisë së Punëve të Brendshme të Serbisë dhe të Njësive të Veçanta të Policisë, të njohura si PJP.

Sipas raportimeve të Gazetës Sinjali, personat e arrestuar janë Novica Peqinoviq, 58 vjeç, Stanoje Janiqeviq, 59 vjeç, Borko Paljiq, 57 vjeç, Sllagjan Millisavljeviq, 58 vjeç, dhe Stanko Saviq, 60 vjeç.

Të dyshuarit janë arrestuar pas më shumë se dy dekadash hetime për njërën nga ngjarjet më të rënda të luftës në Kosovë. Masakra e Reçakut ndodhi më 15 janar 1999 dhe u bë një nga dëshmitë më të njohura ndërkombëtare për krimet ndaj popullatës civile shqiptare gjatë luftës.

Sipas kallëzimit penal të dorëzuar nga Drejtoria për Hetimin e Krimeve të Luftës në Prokurorinë Speciale, të dyshuarit dyshohet se, në bashkëveprim me forca të tjera policore serbe dhe në koordinim me Ushtrinë Jugosllave, kanë marrë pjesë në sulmin ndaj fshatit Reçak.

Në kallëzim, sipas raportimit, thuhet se ky sulm përfundoi me vrasjen dhe masakrimin e dhjetëra civilëve shqiptarë të paarmatosur dhe të pambrojtur. Autoritetet po i trajtojnë të arrestuarit si persona të dyshuar për krime lufte kundër popullatës civile.

Operacioni policor është zhvilluar në orët e hershme të 14 qershorit. Në aksion kanë marrë pjesë Njësia Speciale Operative, njësia K9, Drejtoria e Teknikës Kriminalistike dhe hetuesit e krimeve të luftës.

Gjatë operacionit janë kontrolluar gjashtë lokacione, pesë në komunën e Shtërpcës dhe një në Gjilan. Përveç arrestimeve, autoritetet kanë sekuestruar para të gatshme, uniforma ushtarake e policore, dokumente që dyshohet se dëshmojnë angazhimin e të arrestuarve në strukturat e MPB-së së Serbisë gjatë luftës, fishekë, pajisje policore dhe materiale të tjera që konsiderohen me interes për hetimin.

Në raportimet e mëhershme, Prokuroria Speciale dhe Policia e Kosovës kanë bërë të ditur se identifikimi i të dyshuarve është bërë edhe përmes analizimit të video-incizimeve të kohës së luftës. Prokurori special Ilir Morina ka deklaruar se hetimet për këtë rast kanë vazhduar edhe pas aktakuzës së ngritur më herët për Masakrën e Reçakut.

“Hetimet që i kemi vazhduar gjatë këtyre muajve kemi arritur t’i identifikojmë edhe disa persona që kanë qenë pjesë e njësive të veçanta të policisë së Serbisë asokohe, që kanë qenë pjesë e aksionit më 15 janar në Reçak”, kishte deklaruar Morina para mediave.

Pas arrestimit, të dyshuarit janë intervistuar në prani të avokatëve mbrojtës. Prokuroria Speciale më pas ka caktuar masën e ndalimit prej 48 orësh, ndërsa të dyshuarit janë paraqitur para gjyqtarit të procedurës paraprake.

Rasti “Reçaku 2” konsiderohet një nga operacionet më të rëndësishme të viteve të fundit në hetimin e krimeve të luftës në Kosovë. Arrestimet vijnë në një kohë kur institucionet e drejtësisë kanë intensifikuar hetimet për rastet e pazbardhura të luftës dhe për personat që dyshohet se kanë marrë pjesë në krime ndaj civilëve. /Vrojtuesi

Sipas raportimeve ndërkombëtare, Brent, që përdoret si standard global për çmimin e naftës, ra në rreth 83 deri në 84 dollarë për fuçi. Ndërkohë, West Texas Intermediate, standardi amerikan i naftës, ra në rreth 81 dollarë për fuçi. Këto nivele janë ndër më të ulëtat e muajve të fundit, pas një periudhe të gjatë pasigurie për furnizimin global me energji, shkruan Vrojtuesi.

Rënia erdhi pasi kryeministri i Pakistanit, Shehbaz Sharif, njoftoi se marrëveshja mes SHBA-së dhe Iranit është arritur pas bisedimeve intensive. Më pas, presidenti amerikan Donald Trump e konfirmoi marrëveshjen, duke deklaruar se Ngushtica e Hormuzit do të hapet për qarkullimin e anijeve dhe se bllokada detare amerikane do të hiqet menjëherë.

Ngushtica e Hormuzit është një nga pikat më të rëndësishme të transportit të energjisë në botë. Përmes saj kalon një pjesë e madhe e naftës dhe gazit të lëngshëm që furnizon tregjet ndërkombëtare. Për këtë arsye, çdo tension në atë zonë reflektohet shpejt në çmimet globale të naftës, ndërsa çdo sinjal për rihapje ul frikën për mungesë furnizimi.

BBC raportoi se marrëveshja u njoftua fillimisht nga kryeministri i Pakistanit, i cili tha se palët kanë rënë dakord për ndërprerjen e menjëhershme dhe të përhershme të operacioneve ushtarake. Ai shtoi se ceremonia zyrtare e nënshkrimit pritet të mbahet më 19 qershor në Zvicër.

Trump, në reagimin e tij, tha se marrëveshja me Republikën Islamike të Iranit “është e kompletuar” dhe përdori një formulim të drejtpërdrejtë për tregjet e energjisë. Ai shkroi se autorizon hapjen e Hormuzit dhe heqjen e bllokadës detare, duke shtuar: “Anijet e botës, ndizni motorët. Le të rrjedhë nafta.”

Pikërisht kjo fjali u lexua nga tregjet si sinjal se furnizimet përmes një prej korridoreve më të rëndësishme detare mund të rifillojnë. Në tregjet e naftës, çmimi nuk ndikohet vetëm nga sasia reale e prodhimit, por edhe nga frika për ndërprerje të mundshme. Kur rreziku gjeopolitik bie, zakonisht bie edhe ajo që quhet “premium i rrezikut”, pra pjesa shtesë e çmimit që investitorët paguajnë për pasigurinë.

Megjithatë, rënia e çmimeve nuk do të thotë domosdoshmërisht se karburantet do të lirohen menjëherë në çdo vend. Çmimet në pompa zakonisht ndikohen me vonesë nga lëvizjet në bursat ndërkombëtare, sepse varen edhe nga stoqet ekzistuese, taksat, kursi i valutës, kostot e transportit dhe politika e kompanive të karburanteve.
Në këtë fazë, tregjet po reagojnë më shumë ndaj pritjes se Hormuzi do të rihapet dhe se furnizimi global do të stabilizohet. Nëse marrëveshja zbatohet pa pengesa, rënia e çmimeve mund të vazhdojë ose të paktën të zbusë presionin që kishte rënduar tregjet gjatë krizës. /Vrojtuesi

Sharif njoftoi se marrëveshja është arritur pas bisedimeve intensive dhe se të dyja palët kanë deklaruar ndërprerjen e menjëhershme dhe të përhershme të operacioneve ushtarake në të gjitha frontet, përfshirë edhe Libanin.

“Pas bisedimeve intensive, jemi të kënaqur të njoftojmë se marrëveshja e paqes mes Shteteve të Bashkuara të Amerikës dhe Republikës Islamike të Iranit është arritur”, shkroi Sharif në platformën ‘X’, transmeton Vrojtuesi.

Following intensive talks, we are pleased to announce that the Peace Deal between the United States of America and Islamic Republic of Iran has been REACHED. Both sides have declared the immediate and permanent termination of military operations on all fronts, including in…

— Shehbaz Sharif (@CMShehbaz) June 14, 2026

Sipas tij, ceremonia zyrtare e nënshkrimit pritet të mbahet të premten, më 19 qershor, në Zvicër. Ai falënderoi Shtetet e Bashkuara dhe Iranin për angazhimin drejt një zgjidhjeje diplomatike, si dhe Katarin, Arabinë Saudite dhe Turqinë për rolin e tyre në procesin e ndërmjetësimit.

Sharif tha se, pas arritjes së marrëveshjes, ndërmjetësit do të lehtësojnë një seri takimesh gjatë kësaj jave. Këto takime, sipas tij, do të shërbejnë si bazë për bisedimet teknike dhe përgatitjen e ceremonisë zyrtare të nënshkrimit.

Pas njoftimit të kryeministrit pakistanez, Trump reagoi në Truth Social, ku deklaroi se marrëveshja me Iranin është përmbyllur.

“Marrëveshja me Republikën Islamike të Iranit tani është e kompletuar. Urime të gjithëve”, shkroi Trump.

Ai tha se autorizon hapjen pa pagesë të Ngushticës së Hormuzit dhe largimin e menjëhershëm të bllokadës detare amerikane.

“Anijet e botës, ndizni motorët. Le të rrjedhë nafta”, shkroi Trump.

Ngushtica e Hormuzit është një nga rrugët më të rëndësishme detare në botë për transportin e naftës dhe gazit. Çdo tension në këtë zonë ndikon menjëherë në tregjet globale të energjisë, sepse një pjesë e madhe e eksportit botëror të naftës kalon përmes saj.

Pikërisht për këtë arsye, pjesa e deklaratës së Trumpit për hapjen e Hormuzit pritet të ketë ndikim të madh në tregjet ndërkombëtare. Nëse marrëveshja zbatohet pa pengesa, ajo mund të ulë presionin mbi transportin detar dhe çmimet e energjisë, të cilat janë ndikuar nga tensionet e fundit.

Megjithatë, deri në momentin e raportimit, zyrtarët iranianë ende nuk kanë dalë me një koment të drejtpërdrejtë për marrëveshjen. Televizioni shtetëror iranian e ka raportuar lajmin, por duke iu referuar deklaratës së kryeministrit të Pakistanit.

Sipas BBC Persian, televizioni shtetëror iranian e ka paraqitur zhvillimin si një marrëveshje që Shtetet e Bashkuara u detyruan ta nënshkruanin për t’i dhënë fund luftës me Republikën Islamike të Iranit dhe me atë që Teherani e quan Fronti i Rezistencës. Disa media iraniane po e paraqesin marrëveshjen si fitore të Iranit, edhe pse një qëndrim zyrtar nga autoritetet e larta në Teheran ende nuk është dhënë.

Njoftimi vjen pas disa ditësh sinjalesh se palët ishin pranë një marrëveshjeje. Më herët, raportimet ndërkombëtare kishin treguar se po punohej për tekstin final të marrëveshjes dhe për hapat që do të çonin drejt nënshkrimit zyrtar.

Në këtë fazë, dy elementet më të rëndësishme të zhvillimit janë konfirmimi nga presidenti amerikan dhe njoftimi i kryeministrit pakistanez, i cili ka vepruar si ndërmjetës. Pjesa që ende mbetet për t’u sqaruar është qëndrimi zyrtar i Iranit dhe mënyra se si marrëveshja do të zbatohet në terren gjatë ditëve të ardhshme.

Nëse nënshkrimi bëhet më 19 qershor, siç njoftoi Sharif, marrëveshja do të shënojë kthesën më të madhe diplomatike në raportet mes SHBA-së dhe Iranit gjatë krizës së fundit. Për momentin, vëmendja është te Teherani, te takimet teknike të kësaj jave dhe te hapja e pritshme e Ngushticës së Hormuzit. /Vrojtuesi

Sipas raportimeve të Gazetës Sinjali, viktima dhe të dyshuarit janë djem të axhës. Burimet e këtij mediumi bëjnë të ditur se njëra palë kishte kërkuar që rruga të mbante emrin e babait të tij, ndërsa pala tjetër kishte insistuar që ajo të emërtohej sipas gjyshit. Kjo mosmarrëveshje dyshohet se ka nxitur përplasjen që më pas ka eskaluar në dhunë.

Viktima është identifikuar si A. Osmanaj, 27 vjeç. Ai ka humbur jetën si pasojë e plagëve të marra nga një mjet i mprehtë gjatë konfliktit. Në përleshje është lënduar edhe babai i tij, 57 vjeç, i cili më herët ishte raportuar në gjendje të rëndë shëndetësore.

Lidhur me rastin, më herët ishte raportuar se është ndaluar dhe po intervistohet Albatrit Osmanaj, i cili dyshohet se ka qenë i përfshirë në përleshje. Me përditësimin e fundit, Sinjali raporton se të ndaluar janë dy persona, ndërsa organet e rendit dhe Prokuroria po vazhdojnë hetimet për të zbardhur rolin e secilit në ngjarje.

Personat e ndaluar konsiderohen të pafajshëm derisa fajësia e tyre të vërtetohet me vendim të formës së prerë të gjykatës.

Rastin e kishte konfirmuar edhe kryeprokurori i Prizrenit, Petrit Kryeziu, i cili tha se hetimet janë në fazën fillestare dhe se viktima dyshohet se kishte pësuar lëndime nga mjeti i mprehtë.

“Ajo që mund të konfirmoj në këtë fazë është se një person ka humbur jetën, ndërsa një person tjetër ndodhet në gjendje të rëndë shëndetësore dhe po trajtohet në spital. Bazuar në dyshimet fillestare, viktima dyshohet se ka pësuar lëndime nga mjeti i mprehtë”, deklaroi Kryeziu.

Ai kishte bërë të ditur se në vendin e ngjarjes kanë dalë hetuesit policorë, ekspertët e forenzikës, prokurori i shtetit dhe ekipet e tjera relevante, të cilat kanë ndërmarrë veprimet e nevojshme hetimore.

Për gjendjen e viktimës dhe të babait të tij ishte deklaruar edhe mjeku kujdestar në Emergjencën e Prizrenit, Kujtim Kryeziu. Ai tha për Klan Kosovën se 27-vjeçari kishte arritur në emergjencë me plagë fatale në pjesën e gjoksit dhe se reanimimi i tij kishte qenë i pamundur.

“Pacienti i ndjerë kishte lëndim fatal në regjionin e gjoksit. Me gjasë ishte prekur zemra dhe reanimimi i mëtejmë ka qenë i pamundur. Më pas është konstatuar vdekja e pacientit”, deklaroi Kryeziu.

Sa i përket babait të viktimës, mjeku tha se edhe ai kishte pësuar lëndim në pjesën e gjoksit, por se zemra nuk ishte prekur. Sipas tij, pas intervenimit nga kirurgu, gjendja e tij ishte stabile.

“Pacienti tjetër, rreth moshës 57-vjeçare, ka qenë po ashtu me lëndim në regjionin e gjoksit, në anën e majtë, por nuk është prekur zemra. Është pranuar për trajtim të mëtejmë në repartin e Kirurgjisë dhe gjendja e tij për momentin është stabile, pas intervenimit të kirurgut”, shtoi ai.

Me urdhër të Prokurorit të Shtetit, trupi i pajetë i viktimës është dërguar për obduksion. Hetimet po vazhdojnë për sqarimin e plotë të rrethanave të përleshjes, motivit të dyshuar dhe përgjegjësisë së personave të përfshirë. /Vrojtuesi

Operacioni është realizuar nga Prokuroria Speciale e Republikës së Kosovës dhe Policia e Kosovës, në kuadër të hetimeve për Masakrën e Reçakut. Pesë të dyshuarit u arrestuan në orët e hershme të së dielës, pas bastisjeve në disa lokacione.

Sipas Prokurorisë Speciale, të arrestuarit dyshohen se kanë qenë pjesë e njësive të veçanta të policisë së Serbisë gjatë luftës në Kosovë dhe se kanë marrë pjesë në aksionin e 15 janarit 1999 në Reçak, ku u masakruan 45 civilë shqiptarë, raporton Vrojtuesi.

Detajet për operacionin u dhanë në një konferencë të përbashkët për media nga Prokuroria Speciale dhe Policia e Kosovës. Prokurori special Ilir Morina tha se arrestimet janë rezultat i hetimeve intensive që kanë vazhduar gjatë muajve të fundit, pas aktakuzës së ngritur në dhjetor të vitit të kaluar për këtë rast.

“Hetimet që i kemi vazhduar gjatë këtyre muajve kemi arritur t’i identifikojmë edhe disa persona që kanë qenë pjesë e njësive të veçanta të policisë së Serbisë asokohe, që kanë qenë pjesë e aksionit më 15 janar në Reçak”, deklaroi Morina para mediave.

Sipas Prokurorisë, identifikimi i të dyshuarve është bërë edhe përmes analizimit të video-incizimeve të kohës së luftës. Gjatë konferencës, Morina publikoi pamje nga operacioni policor, si dhe fotografi të dy prej personave të dyshuar, të cilët, sipas autoriteteve, janë identifikuar në bazë të materialeve të luftës.

Drejtori i Drejtorisë për Hetimin e Krimeve të Luftës në Policinë e Kosovës, Bashkim Spahiu, bëri të ditur se arrestimet janë kryer pas një sërë veprimesh hetimore dhe pas ekzekutimit të urdhër-kontrolleve në pronat e të dyshuarve.

Sipas të dhënave të prezantuara nga autoritetet, të arrestuarit janë N.B. nga Shtërpca, ish-pjesëtar i Ministrisë së Punëve të Brendshme të Serbisë; S.J., banues në Shtërpcë, ish-polic i Ministrisë së Punëve të Brendshme të Serbisë; B.P., nga Shtërpca, ish-polic i Ministrisë së Punëve të Brendshme të Serbisë, i cili është arrestuar në pikëkalimin kufitar në Merdar; S.N., banues në Shtërpcë, ish-pjesëtar i Ministrisë së Punëve të Brendshme të Serbisë; si dhe S.S., banues në Gjilan, punëtor në shërbimet postare në Serbi dhe, sipas Prokurorisë, pjesë e formacioneve policore në kohën e kryerjes së veprës penale.

Prokurori bëri të ditur se është realizuar kërkim edhe për një ish-polic serb në Shtërpcë, por i njëjti nuk është hasur në vendbanim dhe nuk është arritur të arrestohet.

Gjatë operacionit, autoritetet kanë konfiskuar materiale dhe sende të ndryshme, përfshirë bexha policorë, uniforma, çanta ushtarake, video-kaseta, targa veturash me shenjën UR, katër telefona, një aparat fotografik dhe mbi 40 fishekë. Po ashtu, janë konfiskuar mbi 30 mijë euro dhe mbi 3 mijë euro në dinarë.

Operacioni “Reçaku II” vjen në vazhdën e hetimeve për Masakrën e Reçakut, një nga ngjarjet më të rënda të luftës në Kosovë. Prokuroria Speciale ka bërë të ditur se, pavarësisht aktakuzës së ngritur më herët, hetimet nuk janë ndalur dhe kanë çuar në identifikimin e personave të tjerë që dyshohet se ishin pjesë e njësive të përfshira në ngjarjen e 15 janarit 1999.

Pas arrestimeve ka reaguar edhe ministri i Punëve të Brendshme, Xhelal Sveçla, i cili tha se nuk do të ketë kompromis ndaj autorëve të krimeve të kryera në Kosovë. Ai përgëzoi Policinë e Kosovës, Prokurorinë Speciale dhe Agjencinë Kosovare të Inteligjencës për realizimin e operacionit.

Sveçla tha se krimet e luftës të kryera nga forcat policore, ushtarake dhe paramilitare serbe po hetohen dhe ndiqen penalisht më shumë se kurrë më parë. Sipas tij, të gjithë ata që kanë planifikuar, urdhëruar apo zbatuar krime ndaj popullatës duhet të përballen me drejtësinë.

Ai përmendi edhe arrestimin e një personi tjetër të dyshuar për vrasjen e civilëve në Ponesh, duke thënë se institucionet do të vazhdojnë ndjekjen e personave të dyshuar për krime lufte derisa secili përgjegjës të japë llogari.

Ministri shtoi se hetimi i krimeve të luftës brenda Policisë së Kosovës është fuqizuar gjatë mandatit të tij, duke u ngritur nga nivel sektori në drejtori dhe duke iu dyfishuar numri i personelit.

Të arrestuarit aktualisht trajtohen si persona të dyshuar. Procedura gjyqësore pritet të përcaktojë masën ndaj tyre, ndërsa hetimet vazhdojnë për sqarimin e rolit të secilit në rastin për të cilin po heton Prokuroria Speciale. /Vrojtuesi