Komisioni Qendror i Zgjedhjeve ka publikuar të dhënat e fundit për zgjedhjet e jashtëzakonshme parlamentare të 28 dhjetorit, duke konfirmuar një dominim absolut të Lëvizjes Vetëvendosje në të gjithë territorin e Republikës.
Pas përpunimit të të dhënave nga 99.26 për qind e vendvotimeve, partia e kryeministrit në detyrë, Albin Kurti, ka siguruar 49.30 për qind të votave, ose e përkthyer në shifra absolute, plot 429,979 vota.
Sipas grafikës zyrtare të shfaqur në faqen e KQZ-së, diferenca me partitë e tjera është e thellë.
Partia Demokratike e Kosovës renditet forca e dytë me 21.01 për qind ose 183,258 vota, ndërsa Lidhja Demokratike e Kosovës ka regjistruar një rezultat të ulët prej 13.59 për qind ose 118,490 vota, shifër kjo që konfirmon një rënie të ndjeshme për partinë më të vjetër në vend.
Aleanca për Ardhmërinë e Kosovës ka arritur të kalojë pragun me 5.68 për qind, ndërsa Nisma Socialdemokrate ka mbetur jashtë Kuvendit me vetëm 1.72 për qind. Pjesëmarrja në votime raportohet të ketë qenë 45.03 për qind.
Në fjalimin e tij triumfues, Albin Kurti e ka cilësuar këtë rezultat si fitore të vetë shtetit dhe jo vetëm të partisë së tij.
“Me 9 shkurt sivjet fitoi LVV me partnerët, me 28 dhjetor 2025 fitoi populli i Kosovës dhe Republika. Urime fitorja më e madhe në historinë e vendit”, deklaroi Kurti para mijëra mbështetësve.
Ai theksoi se me këtë rezultat, qytetarët i kanë dhënë fund epokës së bllokadave politike, duke i hapur rrugë zhbllokimit të fondeve nga Bashkimi Evropian dhe marrëveshjeve me Bankën Botërore.
Një pikë kyçe e adresuar nga fituesi i zgjedhjeve ishte domosdoshmëria e zgjedhjes së Presidentit të ri, proces që kërkon 80 vota në kuti.
Kurti paralajmëroi se do të nisë bisedimet fillimisht me presidenten aktuale Vjosa Osmani dhe më pas me spektrin opozitar.
“Bllokadat janë të pamundshme tanimë. Na duhet të bisedojmë edhe me opozitën për presidentin e ardhshëm. Por, dihet që edhe për zgjedhjen e presidentit, na duhen 80 veta në sallë”, nënvizoi ai, duke bërë thirrje për bashkëpunim në çështjet madhore shtetërore.
Ndërkohë, në kampin e LDK-së, rezultati prej 13.59 për qind është pritur me zymtësi dhe reflektim të menjëhershëm.
Kryetari Lumir Abdixhiku pranoi se rezultati ishte larg pritshmërive dhe ambicieve të partisë.
“Rezultati nuk është ai që kemi pritur dhe nuk është ai që unë si kryetar kam dëshiruar të shoh ndonjëherë”, tha Abdixhiku.
Ai njoftoi se do të thërrasë menjëherë Kuvendin e LDK-së për të diskutuar rrugën përpara, duke mos përjashtuar përgjegjësinë e tij personale.
“Para këtij Kuvendi do t’i shpalosim e shqyrtojmë të gjitha çështjet, përfshirë edhe përgjegjësinë time si kryetar”, deklaroi ai.
Me mbi 99 për qind të votave të numëruara dhe një hartë elektorale që tregon fitoren e Vetëvendosjes në pothuajse çdo komunë, vëmendja tani zhvendoset te procesi i certifikimit përfundimtar nga KQZ.
Albin Kurti ka premtuar konstituim të shpejtë të institucioneve për të vënë në jetë Planin e Rritjes së BE-së në vlerë prej 880 milionë eurosh, ndërsa opozita hyn në një fazë të re të analizës së brendshme pas këtij rezultati plebishitar. /Vrojtuesi
