Dy ditë para se delegatët të mblidhen në sallë, një mesazh publik i ish-kryetarit të LDK-së rikthen kujtimet e përplasjeve të së kaluarës. Thirrja për maturi dhe shmangie të “tifozllëkut” vjen në një kohë kur gara për lidership ka nisur dhe tensionet po rriten.
Ish-kryetari i Lidhjes Demokratike të Kosovës, Isa Mustafa, u bëri thirrje strukturave dhe simpatizantëve të partisë për maturi dhe vullnet vetërregullues vetëm dy ditë përpara mbajtjes së Kuvendit të jashtëzakonshëm.
Përmes një mesazhi publik në rrjetet sociale, Mustafa theksoi se përgjegjësia për rezultatin e dobët zgjedhor të 28 dhjetorit është çështje etike dhe se LDK-ja duhet të shmangë përçarjet që mund ta dëmtojnë rëndë subjektin më të vjetër politik në vend, raporton Vrojtuesi.
Ish-lideri i LDK-së u shpreh se ka refuzuar të përfshihet në debate televizive apo deklarata të degëve për emrat e përveçëm që duhet të udhëheqin, duke insistuar se fatet e partisë zgjidhen në organet vendimmarrëse. Ai paralajmëroi se propaganda dhe “tifozllëku” brenda llojit mund ta kthejnë Kuvendin e thirrur në një arenë përplasjesh, e ngjashme me skenat e pakëndshme të dy dekadave më parë.
“Në LDK problemet më së paku mund të zgjidhen me tifozllëk, andaj format e tilla të propagandës e deformojnë demokracinë dhe mund ta bëjnë Kuvendin e thirrur arenë të përçarjeve, që nuk i nevojitet LDK-së, e cila akoma nuk është shëruar nga një Kuvend i tillë i para njëzet viteve”, nënvizoi Isa Mustafa në reagimin e tij.
Sipas Mustafës, LDK-ja nuk duhet të identifikohet me asnjë emër tjetër përveç presidentit historik, Ibrahim Rugova. Ai kërkoi që procesi i reformave të udhëhiqet nga njerëz besnikë të partisë, por që janë të hapur për prurje të reja, duke kërkuar që të pushojnë ndarjet mes “të vjetërve” dhe “të rinjve”.
Gara për timonin e partisë
Ndërkohë që Mustafa bën thirrje për unitet, brenda partisë tashmë kanë nisur lëvizjet e para konkrete për pasardhësin e Lumir Abdixhikut. Ish-kryeministri Avdullah Hoti ka njoftuar zyrtarisht se do të kërkojë besimin e delegatëve në mbledhjen e 31 janarit 2026. Ky vendim vjen pas dorëheqjes së Abdixhikut, i cili mori përgjegjësinë për rezultatin në zgjedhjet e fundit parlamentare.
Hoti ka premtuar një lidership gjithëpërfshirës, duke u zotuar se asnjë anëtar apo degë nuk do të mbetet në margjina të vendimmarrjes.
“Zotohem se do të ndërtojmë një LDK të hapur, të drejtë dhe konkurruese. Një LDK ku avancimi bazohet në meritë, integritet dhe përkushtim ku profesionistët, gratë dhe të rinjtë e gjejnë hapësirën që u takon”, u shpreh Avdullah Hoti gjatë shpalljes së kandidaturës së tij.
Kuvendi i 31 janarit u thirr pas një mbledhjeje maratonë të Kryesisë, ku zyrtari i partisë, Besian Mustafa, konfirmoi se fillimisht do të procedohet me votëbesimin për Abdixhikun.
Megjithëse Abdixhiku e ka quajtur këtë moment si një “mundësi dhe jo krizë”, dorëheqja e figurave kyçe si Hykmete Bajrami ka shtuar presionin për ndryshime rrënjësore në krye të partisë.
Rënia e lirë: Pse humbi LDK-ja 52 mijë vota brenda një viti?
Analistët politikë vlerësojnë se LDK-ja po kalon një nga periudhat më të vështira që nga themelimi. Krahasuar me zgjedhjet e 9 shkurtit 2025, ku partia mori mbi 171 mijë vota (18.27%), në zgjedhjet e parakohshme të 28 dhjetorit mbështetja ra në rreth 119 mijë vota (13.23%). Kjo humbje prej 52 mijë votash përkthehet në vetëm 15 ulëse në Kuvendin e Kosovës.
Analisti Imer Mushkolaj, në një prononcim për Radion Evropa e Lirë, vlerëson se “vrasja” e koalicioneve të mundshme nga ana e Abdixhikut ishte fatale.
Sipas tij, refuzimi i prerë për të bashkëpunuar si me LVV-në, ashtu edhe me partitë e tjera opozitare (PDK e AAK), krijoi perceptimin e një partie që nuk synon pushtetin, duke dekurajuar votuesin tradicional dhe atë të pavendosur.
Nga ana tjetër, Rrahman Paçarizi thekson se margjinalizimi i strukturave të vjetra ka bërë që një pjesë e elektoratit të moshuar të abstenojë. Ai shton se LDK-ja dështoi të mobilizonte “zonën e hirtë” të votuesve, të cilët pas zgjedhjeve të shkurtit prisnin veprime konkrete dhe jo vetëm retorikë opozitare.
Peizazhi i ri politik pas 28 dhjetorit
Rezultatet përfundimtare të KQZ-së konfirmuan dominimin e Lëvizjes Vetëvendosje, e cila fitoi 51.11% të votave, duke siguruar 57 mandate. Ky është rezultati më i lartë i arritur ndonjëherë nga një parti politike në Kosovë, me Albin Kurtin si personin më të votuar me mbi 404 mijë vota.
Renditja e partive në Kuvendin me 120 vende:
• LVV: 57 vende (51.11%)
• PDK: 22 vende (20.19%)
• LDK: 15 vende (13.23%)
• AAK: 6 vende (5.50%)
• Minoritetet: 20 vende (Lista Serbe 9 vende)
Zgjedhjet e 28 dhjetorit erdhën si pasojë e bllokadës institucionale pas zgjedhjeve të 9 shkurtit 2025, ku partitë nuk arritën të konstituonin Kuvendin deri në tetor.
Tashmë, sytë e opinionit publik janë kthyer nga shtëpia e LDK-së për të parë nëse Kuvendi i 31 janarit do të jetë një moment ringritjeje apo vazhdimësi e krizës së brendshme. /Vrojtuesi
