Pas më shumë se 25 viteve kërkime intensive dhe një procedure kirurgjikale tejet komplekse, në Britaninë e Madhe ka lindur foshnja e parë nga një mitër e transplantuar prej një donatoreje që nuk jeton më. Ky sukses mjekësor jo vetëm që sfidon biologjinë, por hap rrugën për një program të ri kombëtar të fertilitetit.
Një foshnjë djalë është bërë fëmija i parë në Mbretërinë e Bashkuar që ka lindur duke përdorur një mitër të transplantuar nga një donatore e vdekur.
Ky zhvillim mjekësor, siç raporton BBC, konsiderohet një kthesë e rëndësishme për mjekësinë riprodhuese, duke u ofruar shpresë grave që kanë lindur pa mitër ose kanë dëmtime të këtij organi, transmeton Vrojtuesi.
Kirurgët e përfshirë në këtë proces e kanë cilësuar lindjen si “një moment historik”, i cili pritet të hapë rrugë të reja për shumë gra me diagnozë të ngjashme.
Nëna e foshnjës, Grace Bell, e cila është në të 30-at, lindi pa një mitër funksionale për shkak të një gjendjeje të rrallë shëndetësore. Djali i saj, Hugo, tani është dhjetë javësh dhe gëzon shëndet të plotë.
“Thjesht një mrekulli”, tha Bell për djalin e saj, duke shprehur mirënjohje të thellë për mundësinë e papritur që iu dha përmes shkencës dhe humanizmit.
Hugo lindi pak para Krishtlindjeve të vitit 2025 në spitalin Queen Charlotte’s dhe Chelsea në Londër, me një peshë prej rreth 3.2 kilogramësh. Bell ishte diagnostikuar në moshën 16-vjeçare me sindromën MRKH, një gjendje që prek rreth një në 5,000 gra në Mbretërinë e Bashkuar. Kjo sindromë nënkupton mungesën e mitrës, duke e bërë të pamundur mbajtjen e një shtatzënie në mënyrë natyrale.
“Mendoj për donatoren time dhe familjen e saj çdo ditë dhe lutem që ata të gjejnë paqe duke e ditur se vajza e tyre më dha dhuratën më të madhe: dhuratën e jetës”, u shpreh Bell, duke shtuar se “një pjesë e saj do të jetojë përgjithmonë”.
Procesi i ndërlikuar mjekësor nisi në qershor të vitit 2024, kur Bell iu nënshtrua një operacioni dhjetë-orësh për transplantimin e mitrës në Spitalin Churchill në Oxford.
Pas rikuperimit, çifti mori trajtim përmes IVF-së dhe transferimit të embrionit në Klinikën e Fertilitetit Lister në Londër.
“Më kujtohet kur u zgjova në mëngjes dhe pashë fytyrën e tij të vogël, me biberonin e tij, dhe ndjehesha sikur duhej të zgjohesha nga një ëndërr. Ishte thjesht e pabesueshme”, deklaroi nëna e Hugos.
Ky sukses është pjesë e një prove kërkimore klinike në Mbretërinë e Bashkuar, ku janë planifikuar gjithsej dhjetë transplantime të tilla.
Ky rast shënon lindjen e parë nga një donatore e vdekur, ndryshe nga fillimi i vitit 2025, kur foshnja Amy lindi përmes një mitre të dhuruar nga një person i gjallë, konkretisht motra e nënës së saj.
Ekipi mjekësor që udhëhoqi procesin ka punuar për këtë arritje për më shumë se dy dekada.
Profesor Richard Smith, i cili filloi kërkimet mbi transplantimin e mitrës mbi 25 vjet më parë, theksoi se në këtë proces ishte përfshirë “një ekip i madh njerëzish”, nga operacioni i transplantimit deri te transferimi i embrionit dhe vetë lindja.
Bell dhe partneri i saj, Steven Powell, treguan mirënjohjen e tyre ndaj profesorit Smith duke i vendosur djalit emrin e mesëm Richard. Për shkak të efekteve të forta të medikamenteve që parandalojnë refuzimin e organit, Bell do të mbajë mitrën vetëm deri në përfundimin e planeve familjare. Pas një fëmije të dytë të mundshëm, kirurgët do të heqin organin e transplantuar për të kursyer nënën nga marrja e barnave të rënda gjatë gjithë jetës.
Edhe kirurgia Isabel Quiroga, bashkëdrejtuese e ekipit, u shpreh e “kënaqur” me lindjen e Hugos, duke e cilësuar si një hap të madh për mjekësinë britanike.
Quiroga shtoi se prova klinike synon të zbulojë nëse kjo procedurë mund të bëhet një trajtim i miratuar dhe i rregullt për numrin në rritje të grave që nuk kanë një mitër funksionale.
Ndryshe nga organet e tjera, dhurimi i mitrës nuk është automatik dhe lejohet vetëm përmes një kërkese të veçantë drejtuar familjeve të donatorëve.
Prindërit e donatores , emri i së cilës nuk është bërë publike, shprehën “krenari të jashtëzakonshme” për trashëgiminë e lënë nga vajza e tyre, e cila dhuroi edhe pesë organe të tjera.
“Përmes dhurimit të organeve, ajo u ka dhënë familjeve të tjera dhuratën e çmuar të kohës, shpresës, shërimit dhe tani jetës”, deklaroi familja e donatores.
Hapi i radhës për këtë program mjekësor në Britaninë e Madhe përfshin pesë transplantime të tjera të planifikuara nga të afërm të gjallë, ndërsa procesi i monitorimit të Hugos dhe nënës së tij do të vazhdojë sipas protokolleve spitalore. /Vrojtuesi
