Kosova ka humbur një nga figurat më të shquara të historisë së saj parlamentare dhe akademike. Është ndarë nga jeta ish-Kryetari i Kuvendit të Kosovës dhe anëtari i Akademisë së Shkencave dhe të Arteve të Kosovës, Nexhat Daci.
Largimi i tij shënon fundin e epokës për njërin nga protagonistët kryesorë që hodhën themelet e institucioneve të para demokratike të vetëqeverisjes në vend, duke lënë pas një trashëgimi të dyfishtë në sferën e politikës dhe atë të shkencave natyrore.
Lajmi për vdekjen e akademikut është konfirmuar nga Dimal Basha, kryetari në detyrë i Kuvendit të Kosovës.
Përmes një njoftimi në facebook, Basha i ka shprehur ngushëllimet familjes Daci, duke nënvizuar rolin e tij vendimtar në vitet e para të pasluftës.
“Gjatë viteve të shërbimit të tij në krye të Kuvendit të Kosovës, ai la gjurmë të pashlyeshme në historinë e demokracisë parlamentare të vendit tonë. Me vizion, maturi dhe përkushtim, z. Daci kontribuoi në ndërtimin e institucioneve demokratike,” u shpreh Basha.
Ai shtoi se trashëgimia politike e Dacit mbetet pjesë e historisë së Kuvendit dhe përpjekjeve për shtetndërtim.
Nexhat Daci, i lindur në Tërnoc më 26 korrik 1944, mbajti postin e Kryetarit të Kuvendit të Kosovës nga viti 2001 deri në vitin 2006, duke u bërë kështu drejtuesi i parë i organit më të lartë legjislativ pas zgjedhjeve të para të lira në Kosovë.
Si një nga figurat më me peshë në Lidhjen Demokratike të Kosovës gjatë epokës së presidentit Ibrahim Rugova, ai njihej për stilin e tij autoritar por institucionalist të drejtimit të seancave parlamentare.
Përplasjet e brendshme politike pas vdekjes së Rugovës çuan në largimin e tij nga partia amë dhe formimin e subjektit të ri politik, Lidhja Demokratike e Dardanisë (LDD), të cilën e drejtoi për disa vite përpara se të tërhiqej gradualisht nga jeta politike aktive.
Përtej profilit politik, Daci ishte një emër i spikatur në botën akademike, me një karrierë të gjatë si profesor i kimisë dhe studiues shkencor.
I diplomuar dhe magjistruar në Universitetin e Beogradit dhe doktoruar në Universitetin e Zagrebit, ai kreu specializime të thelluara në Mbretërinë e Bashkuar dhe Belgjikë.
Kontributi i tij shkencor u kurorëzua me anëtarësimin në Akademinë e Shkencave dhe të Arteve të Kosovës, institucion të cilin gjithashtu e drejtoi në dy mandate të ndryshme.
Ai ishte autor i dhjetëra teksteve universitare dhe monografive shkencore, si dhe anëtar i Shoqatës Kimike Amerikane.
Nexhat Daci la pas bashkëshorten dhe tre fëmijë, ndërsa vepra e tij mbetet e dokumentuar në arkivat e shtetit dhe ato të shkencës shqiptare. /Vrojtuesi
