Bashkimi Evropian ka vendosur kushte të qarta për udhëheqjen e re në Prishtinë menjëherë pas përfundimit të procesit zgjedhor të 28 dhjetorit.
Shefja e diplomacisë evropiane, Kaja Kallas, ka bërë thirrje për formimin sa më të shpejtë të institucioneve të reja, duke e lidhur këtë proces me lëvrimin e qindra miliona eurove të Bashkimit Evropian.
Kjo kërkesë vjen në një kohë kur rezultatet paraprake konfirmojnë një fitore të thellë të Lëvizjes Vetëvendosje, çka i jep partisë fituese përgjegjësinë për të shmangur vonesat në konstituimin e qeverisë dhe Kuvendit.
Kallas ka konfirmuar se Bashkimi Evropian po lëviz drejt heqjes së masave ndaj Kosovës, duke vlerësuar se procesi zgjedhor dëshmoi një angazhim të fortë ndaj parimeve demokratike.
Sipas përfaqësueses së lartë të BE-së, transferimi i rregullt i qeverisjes lokale pas zgjedhjeve të fundit komunale ka mundësuar tashmë lëshimin e 216 milionë eurove ndihmë financiare.
Megjithatë, mbështetja e mëtejshme mbetet e kushtëzuar me stabilitetin institucional, ku synohet lirim i 205 milionë eurove shtesë në fillim të vitit të ardhshëm.
Në deklaratën e saj të parë pas mbylljes së kutive të votimit, Kallas ka porositur ekzekutivin e ardhshëm që të dyfishojë përpjekjet për reformat që lidhen me agjendën evropiane.
Një kërkesë specifike i është drejtuar përbërjes së re të Kuvendit të Kosovës për të ratifikuar pa vonesë marrëveshjet që lidhen me Planin e Rritjes.
Ky instrument financiar, i cili mbulon periudhën 2024–2027, konsiderohet një mundësi me afat të kufizuar kohor që kërkon veprim të menjëhershëm legjislativ për të sjellë përfitime direkte për popullin e Kosovës.
“Plani i Rritjes për Ballkanin Perëndimor është një instrument me afat të kufizuar kohor, i miratuar për periudhën 2024–2027, dhe është në interesin e Kosovës që ratifikimi të bëhet sa më shpejt që të jetë e mundur, për të shfrytëzuar plotësisht të gjitha mundësitë që ofron ky plan, në dobi të popullsisë së saj”, ka deklaruar Kallas.
Kjo thirrje përkon me zotimet e fituesit të zgjedhjeve, Albin Kurti, i cili në fjalimin e tij pas fitores premtoi zhbllokimin e fondeve ndërkombëtare dhe përfundimin e epokës së bllokadave politike në vend.
Përveç kërkesave ekonomike dhe administrative, Bashkimi Evropian ka rikonfirmuar se progresi i mëtejshëm mbetet i lidhur ngushtë me dialogun me Beogradin.
Kallas ka nënvizuar se normalizimi i marrëdhënieve ndërmjet Kosovës dhe Serbisë vazhdon të mbetet e vetmja rrugë që të dyja palët të avancojnë në proceset e tyre integruese.
Sipas saj, Brukseli pret që të gjitha detyrimet që rrjedhin nga Marrëveshja për Rrugën drejt Normalizimit dhe marrëveshjet e mëparshme të zbatohen pa vonesa dhe pa kushtëzime të reja nga asnjëra palë.
Përfaqësuesja e Lartë e BE-së ka shprehur gatishmërinë për të organizuar një takim të nivelit të lartë politik sapo të krijohen kushtet e nevojshme.
Ky mesazh i dërgohet Prishtinës zyrtare ndërkohë që Komisioni Qendror i Zgjedhjeve po vijon me numërimin e votave, ku deri më tani, Lëvizja Vetëvendosje ka siguruar 49.30 për qind të mbështetjes qytetare. /Vrojtuesi
